Jom Naik Bas chapter 91213

بِسْمِ اللهِ الرَّحْمنِ الرَّحِيمِ

السلام عليكم

الله اكبر

Adik-kakok sekelian, lamo doh adik tak menaip blog nih, jak dari rayo ari tu!, buke apo, adik banyok bedooh projek, tak de nak peta'. Peta' situ sikit, peta' ssinih sikit, lepah tu tak siap belako!. lagu lah bos adik kato, kalu tak dok fokus khijo kito nih, tak sampa lah destinasi kito!. kita nih dale kerijo, ibarat turun kedunia, tujuan kita nak gi keakhirat, pasa banyok benda sukko-rio, kita dok ngalik, sapo teluppoa tujuan asal kito!, mintak maah lah ceramoh sikit!.

jadi ari nih nyo adik nak cerita pasal pejalane adik ke ranta paje sekali lagi, tapi kali nih adik masuk 4 laluan hok cityliner ado!

1. 54 - KB-Pasir Mas melalui Meranti. Ha! kalu nak gi pasir mas kita bulih naik bas nih, selain dari bas 29!. Laluan nih, kalu nak gi pasir mas sesuailah kalu tak loghat sangat gak, sebab laluan dia jauh sikit dari laluan bas cepat, tapi menarik. menarik buke sebab ggapo, sebab dia lalu kok bendae padi!. ore KADA ramai ssitu, KADA nih agensi keraje bersabit denge kementerian pertanian lah. Maso adik lalu aghi tu ado lah mok cit tu dok cerito pada tane padi, dio kato, la nih KADA wi kok cino buah bendae padi, kalu dulu oghe melayu buat bulihlah seratus dua, tapi sakat bui ko cino nih, bulih sapo limo ratuh!. Pah lagu mano nih adik kakok!, dulu adik dok kato, cino nih panda nnego jah!, la nih nnane padi pun nyo tae kok puak dio!, pendek kato gok! tak leh nak kato ggapo ....!. Lepah tu so lagi mok cik tu kato cino nih nyo buat padi sungguh2, nyo upah bangla buat padi, oghe banggla nih tidok dok krenak ko kito, mudah kkiro, kalu mintak tulun racu rumput sikit nyo racun ko dia!, kalu oghe kito, tak leh nak arah, krenak ko kito pulok!. huh! huh! huh! ... sedih sunnguh sedih, supo main bola "gomo kelate gomo", rupo-ruponyo nyo gomo samo sediri!. Aisye man, terbabas pulak, nyo cerito pasa mokcik tu pulok, nin pasa laluan 54 nih, sapo-sapo hok nak gi ke sekolah teknik Pasi Mas tu, hah bulih lah naik bas nih!

2. 29 - Kota Bharu - Rantau Panjang. Laluan nih adik raso adik cerito doh!. Untuk gi ranta paje, dari bas 54 tadi, buleh lah naik bas 29 nih!, baha nih direct teruh masuk ke kawasan bebah cukae

3. 54 - Rantau Panjang - Pasir Mas melalui repek. Laluan nih adik kakok, lalun ke pasir mas melalui jale lamo. Ha, sebelum ada jale baru, laluan 29 tu, jale nih lah kena guna kalu nak gi ke Ranta Panje. Laluan nih laluan kampung, laluan nih lalun menyuru sungai golok, kalu lalu kok jale nih raso mace duk aleh sano, ho nak buat guano plek muto semua paka plek alik ssano!. muruh benar bekali muto alik sano, sebab tu lah ko kure oghe naik bah, nyo beli muto muroh alik sano!. Laluan nih juga menarik, sebab banyok bendo hok bulih tengok, laluan dia kade2 sempit sebab pokok bute dok make kok bira jale, 2-3 kali cermin sisi adik dok belago nge ratin pokok!.

4. 29 - Pasir Mas - Kota Baru, serupo tak dik juga, bah 29 nih bah cepar dati RP ke KB, bah 54 tu sampa ke Pasir Mas jah, jadi kalu nak balik ke KB bulih lah naik bas 29!

Adik berita sekat nih lah dulu, sakit pingge adik ari nih pungguh oghe gi maghi- gi maghi!

Sekian

Rayo

بِسْمِ اللهِ الرَّحْمنِ الرَّحِيمِ

السلام-عليكم

Apo khabar abe-abe, kakok-kakok sseme! Adik sibuk sungguh bule lape baru nih, bele-bele letih bule pose. La nie dekat rrayo doh, harak-harak bule pose nih, kita boleh belako hok tuhe offer, rahmat!, keampune! dan jauh dari api nerako!. Api nerako nih adik kakok jange dok main2. abadan! abadan!. selama-lamanyo.

Sempena hari raye nih, adik nak ppatun sikit :

Gi keje, naik bas
Naik bas, balik kapung
Bule pose dah nak lepah
Mintak maaf, mintak apun

Jadi sempena hari raya nih, adik nak mintak maaf dan ampun, tak kiralah hok adik kenal secara peribadi, ataupun penumpe-penumpe adik yang selalu gi maghi denge bas dan semua sekali lah!

Raye nih ado tiket belako ko?, hok mano tak dok tiket tu, tanyo-tanyolah agen tiket, takut ado tiket hok oghe tolak.

Sekian sajo lah cerito adik ari nih, sikit sikit la nih, dok bawok oghe Gua Muse. La nih bas Gua Muse pakat bas 2 tikat doh!, bas SCANIA, tak berayut dok datah pun!.

Cityliner Jarak Jauh

بِسْمِ اللهِ الرَّحْمنِ الرَّحِيمِ

السلام-عليكم


Adik baguu lepah naik bas peri, adi kato doh demo tak ccayo, kalu abe2 dan kakok2 gi Koto baghu aghi sabtu kemaghin, mesti bulih naik bas peri!.

Ari nih nya adi nak cerita pasal perjalanan jarak jauh Cityliner. Kalu dulu abe2 dan kakok2 nak gi Gua Muse, kena beli tiket di kaunter Cityliner, la nih nyo, mula 1/8 ari tu, abe2 dan kakok2, kita paka sistem online doh, nih hok Cityliner, buke hok Transnasional tu!, tapi kita paka ejen tula lah dengan Tranasianal, cuma sistem tiket dan tiket lain sikit la!.

Dengan sistem baru nih, abe2 dan kakok2 bulih lah beli teket gi balik ko, nak beli awal sebule ko, tamboh2 musim rayo nih.

Antara Laluan jarak jauh Cityliner adalah serupo bbawah nih :

1. KB - Gua Muse
2. KB - Gganu
3. Ratae panje - Gganu
4. Gannu - Kuante
5. KB - Grik

Ha tu dia, tapi kalu nak gi KB-Grik dan jugo Gganu - Kuante (Cheneh) tu, tiket atah bas ado jugo, tapi kalu tak dok tepat duduk tu keno ccace lah.

Sekie lah dulu, tak nak nnulih lamo-lamo la nih, sibuk sket, tu hok tuli datah tu paka tak cek doh tu, mintak maaf lah kalu salah taip ko!

p/s : bule pose dekat doh nih, buat amal banyok banyok, umur kite ko lamo ko sikit!, ingot hok nak bawok alik sano retek!

Free Ride

بِسْمِ اللهِ الرَّحْمنِ الرَّحِيمِ

السلام-عليكم


PERCUMA! PERCUMA! PERCUMA!

maghi-maghi adik kakok pakat nak bas percuma ari sabtu nih 8/8/2009 stat 8 pagi hingga 7 male. Sengoti nih, naik bas peri tak bbekok lasung, tapi, keno naik bas hok ada stiker PERCUMA HOTLINK saya ulangi stiker PERCUMA HOTLINK . buke ggapo sebab HOTLINK belanjo ari tu sari, kalu dreba mitok pitih ari tu, riput kok HOTLINK.

maghi! maghi! maghi!, PERCUMA!, PERCUMA!, PERCUMA!

Fast Pass

بِسْمِ اللهِ الرَّحْمنِ الرَّحِيمِ

السلام-عليكم


Adik kakok sekelian, ari nih adik nak perkenalkan fast pass!. Sebenarnya projek nih lamo doh syarikat duk rangce, tapi tergandala sikit sebab masaloh teknikel.

Fast pass nih sebenarnyo pada asal projek prepaid, zame la nih oghe paka prepaid belako, tapi disebabke sambutan dari pelanggan bas nih kure memuaskan, jadi kito modified sikit untuk di sesuaikan denge kehendak penlangge, sekure-kurenya pelangge ada maso untuk belajar guno prepaid untuk tiket bas.

Projek fast pas nih, mula doh di Serembe dengan Selangor, cumo di Kelate nih kita akan mula tengah bule lape nih secara berperingkat-peringkat.

Jadinyo adik kakok maghilah rama-rama kita pakat naik bas Cityliner, bo lah dok naik prebet sapunyo, tak dok insuren. bo! la dok bowak mutto, maklumlah bawok mutto nih risoko tinggi sikit. bawok muto nih abe, supo buah timun dudok dale lori buah duye, kito tepoh demo, kita sakit, demo tepoh kito, samo teloh lah!, La ni pulok, insure mutto mahal pulok, jadi naiklah bas ambo! ko guano adik kakok weih!

Sekian saje lah dulu
Wassalam, dari adik CT lainer, pelik cium untuk pelanggan semua

p/s : bule pose nak maghi doh, bulih lah kalu nak belatih poso

Fusss

بِسْمِ اللهِ الرَّحْمنِ الرَّحِيمِ

السلام-عليكم

Apo khabar, semua adik kakak, sihat belako ko, lamo adik bereti, sejak brek nggejuk ari tu, buke ggapo, sibuk duk punggoh oghe gi maghi gi maghi, tak dae nak mengoh, nih baru bulih nnulis sikit dale kesibuke kerje.

Selain duk punggoh oghe, banyok benda hok adik nak update, selain dari tambe dan laluan bas, banyok pembaikkan hok syarikat adik duk tengoh buat. Nanti adik royat so-so.

Cuma untuk catatan semula-semula nih adik ake kure ke, google maps nih, sebab, adik dok perati, kalu ada banyok sangat google meps nih, blogsopt nih jadi anjo (slow). adik akan guna link dia sajo untuk nak tengok goole meps.

Antara projek hok dok sibuk la nih :
1. Fast pass
2. Sistem Cityliner Ekpress Route
3. FMS

nati adik cerito so! so!,

Sekian sajo dulu, adik nak gi punggoh oghe gi Pasir Mas dulu, kalu nak gi pasir Mas bulih naik 29!

okey chiow
ps : tak dae nak cari gambor, paka post telanje bogel gginih jah dulu, nak mmasuk gamba semula

Pengkalan Chepa

View Larger Map

USM

بِسْمِ اللهِ الرَّحْمنِ الرَّحِيمِ

السلام-عليكم

Dulu adik ada saie kkijo sekali, tue comel llote, puteh ssepo, peranga moleh, mudoh kkiro, la nih di kkijo di USM doh, tapi adik buke nak cerito pasal saie adik tu, hok adik nak cerito pasa bas adik hok masuk dale USM. Semua oghe tahu, kalu nak parking di USM nih tuhe sajo hok tahu payoh nyo nak bulih. Ha tu la adik kato, sapo suru naik kereta, maghi kita pakat naik bas, tak payaoh pening ppalo!. Jadi ari nih nyo adik nak cerita pasal bas bandar 60. Laluan bah bandar nih cuba adik tengok bbawoh ni :



View Larger Map

Bas bandar nih, laluan kebajike hok sarikat adik sedia untuk rakyat kelate kito nih segabai oghe ptih kato "sosial obligation". Ha tu dia, tulih kok oghe putih sikit. Tapi buke free, keno bayar jugak, tapi gak kita jjale bas dale rugi, oghe kato gok kalu pelangge kita bayar 10 sen, kita kena tambah 10 sen lagi nak suruh bulih jjale bah tu.
Jadi nyo maghilah kita pakat-pakat naik bas nih, bas nih lalu kok bere 12, terus ke cherang, jpj panji. Lepah tu sapa trafik lait panji, di kona kane terus masuk USM. Sapo-sapo nak nnawat oghe sakit tu tak soh gi la kena kreto, silap-silap kena kuci tayar. Set-set pok gad USM maik kuci tayar jugo, jange ttebe main.
Dari USM tu dia tubik kona kok kiri terus ke ccabe 4 kube kerian, nyo ambik kona kane terus hala ke wakaf sikuf, tapi sebelum trafik lait maybank taman maju, nyo kona kok kiri masuk jale telipot sapalah trafik lait telipot. Lepah tu nyo ambik kona kanan masuk bandarlah sapa ke stesen bas kota baru, tu lah jale bas bandar no 60.
Kalu hok nak tawaf bandar kota baru, bulih lah naik bak ni, nak gi kb mall ko, bulehlah pasal dia lalu jugak kok depe kb mall tu. Sikit lagi Kube kerie nih ada banyok mall, mydin terbesarlah, Kube kerian center la, ha bulih lah paka naik bas nih. So lagi, di kube kerian nih dia banyok Inn-inn hok baru, ya lah hok mano ado warih nak sewa ko, boleh cade di kube kerielah pade dok gelewak di kota baru, sebab klu nak gi kota baru mudah jah, naik bas 60, ya adik kakok, naik bas 60!.

Adik bereti ssinih dulu lah!. brek mengejut, weeeeeeeeeeeeeeeeeeeeet


Laluan : Bandar 60
Jarak : 18 KM (satu pusingan)
Tambang : RM 1.50
Masa Perjalanan : 30 Minit
Kekerapan : 30-45 minit
Jenis Bas : Mini Aircond

Kalu Nak Gi Rantau Panjang

بِسْمِ اللهِ الرَّحْمنِ الرَّحِيمِ

السلام-عليكم

adik kakak semua!

Oghe luar berehi benar nih, Rata Panje (Rantau Panjang), Kalu maghi di kelate, kalu tak gi ke Rantau panje nih, tak sah maghi kelate, tu kalu oghe maghi jale jare-jare, tapi kalu hok acak ddooh maghi di rantau panje, hok beso bbelilah, dia kato di chow kit belana-lana, muroh pulok tu!, haa jago mmoleh oghe rantau panje, jange dok meta kedaroh sangot, skit lagi kalu oghe gege, tahu bela bare demo maha, tak laku la puak demo, tu adik nak pese!, adik ado dengar doh sediri!.

Tapi adik aghi nih buke na cerita pasa bare maha di rata panje, adik nak royak pasal naik bas di rata panje. Acu tengoh peta rata panje :


View Larger Map

Kalu nak gi rata panje, naiklah bas no 29 di setesen bas Kota Bharu. Tambe dia, mugho jah adik bui, tambe dia nyo ialah lima riya spuloh sen (RM 5.10). murah jah, oghe putih, oghe hite pakat naik belako bas adik nih, oghe melayu oghe sie sama telah lah, cumo oghe male jah jare-jare, sebab bah tak jjale alik male, tapi kalu ada sambute, adik sedia sedia bas, lagu mano, ado oghe nak gi rata paje alik male ko?, dengar cerito, sepade tutup pukul 10, dae lagi lah hok mano nak balik alik sie tu, ko guano?

Aloh, sutuk nyo masa, tapi adik cito sikit lagi lah. Laluan rata paje nih, dia lalu ikut ghetok sultan yahya, tu lah, ghetok pasir pekan hok ssohor sekali di kelate tu, ssitu, bulihlah tengok, KB Mall, tesco, jale hamzah. Lepah sapa di raun abaut mulo² di gi kok kane, alah nak gi ko Pasir Mas, Kalu oghe puteh, dia bulih lah nak tengok rumoh kapung, suasana kapung, kalu nasib baik, bulihlah tengok lembu kambing, tapi kalu kita oghe ssinih doh, sedak tidur lah, tambah-tambah bas aircon, bas cepat pulok. Bas cepat nih sebenarnyo bas hok berenti jare² jah tengoh jale, jadi cepatlah sikit sapa ke rata paje. Sebelum sape di rata paje, bas nih singgah dulu di stesen bas pasir mas, tepat oghe lawa² mace adik CT nih, :) he he, perase ssore!.

Kalu tak se gi rata paje, pasir mas pun belana bo nak bbeli bare, tapi mugo kita baya tambe rata paje, kita gi rate panje lah!. Dari Pasir Mas, kita terus ke rata panje, masuk terus ke stesen bas rata panje. Stesen bas meme dok dekat denge mereket dia, dale 50 meter jah. Hok tu lah kalu nak bbeli baghe di rata panje baik naik bas lah. Ada arih tu mok sedaro adik gi beli mugo kkakah oghe kawin di rata panje, acu jah nak lepah kastan tu kena tahe kereta dia, lepah kena cukai. ssie kok dia, nak cari bare muroh jatuh ko mahal pulok!. Tapi rata panje nih sekat bare murah jah oghe gi, hok ssoho dia banyok pilihe, tiap² bule ada model baru, jenis baru, design baru. tapi banyok produk alik sie, haloh kita kok oghe sie!.

Adik bereti sekat nih lah dulu, nanti adik sambung lagi bahagia rata paje, pasal bare-bare hok ssoho la nih di rata panje, sambil sambil ngepen naik baik, nak ngepen bela bare lah sikit, moga² negeri kelate kita nih maju!

sekian
Laluan KB - Rantau Panjang :
Jarak : 45 KM
Tambang : RM 5.10
Masa Perjalanan : 1 jam
Kekerapan : 30-45 min
Jenis Bas : aircond

Manghi Pakat Naik Bas

Assalamualaikum semua adik kakok!

Adik ni, namanyo Cik Siti Lainer, kalu kok oghe putih di jadi 'Cityliner'. Maklumlan zame la nih semua kena maju, semua kena cepat, semua kena selamat. Jadinya adik nak ngepen sikit lah, nak suruh semua puak-puak kita nih sama-sama maju, oghe kato, berat sama kito pikul, kalu reknge same-same kita jinjing.

"Bare come, kualiti molek, rego muroh", hok nih lah semua oghe nak, hok nih lah adik nak cerito nih, lagu mano kita nak bulih bare lagu nih!, nanti adik akan cerita dale tulise hok ake date'.

Untuk ari nih, adik nak ajak lah adik kakok, mok cik - pok cik, abe-abe semua maghilah pakak naik bas kita, Cityliner Kelantan. Sebab apo kita nak naik bas, haaa, naik bas nih banyoklah kenuntungan, tambah tambah zaman rege bare go maha belaka.

Kalu kita naik bas, Kita jimat duit , hok nih semua oghe tahu!
Kalu kita naik bas, Kita dilindungi oleh insure, hok tu lah jange dok naik prebet sapu!
Kalu kita naik bas, Kita rase selamat, sebab drebar hok terlatih dan ada lesen PSV!
Kalu kita naik bas, Kita rase selesa, sebab bas la nih ada aircon belako!
Kalu kita naik bas, Kita bulih rehat, maklumlah ada oghe tulong bawak!
Kalu kita naik bas, Darah tak naik sebab jem, la nih kelate pun jem, tak nnati kolumpo!
dan banyok lagi paedah hok kito bulih .. tu adik baru bagi sikit !

Kalu lagu tu gak adik rasa moleklah kita pakat naik bas belako :

Kalu nak gi sekoloh, kita naik bas
Kalu turun bas pagi dari Kola Lumpur ko Johor ko, Kita naik bas
Kalu nak gi keje, kita naik bas
Kalu balik keje, kita naik bas
Kalu nak gi shopping, kita naik bas
Kalu nak gi ceramoh, kita naik bas
Kalu nak gi expo, kito naik bas
Kalu nak gi interview, kita naik bas
Kalu nak gi market, kita na ik bas
Kalu nak gi pejabat tanoh ko, pejabat pos ko, kita naik bas
Kalu nak gi dating, kita naik bas

Banyok kalu lagi nih, kalu tulih habih tak sudoh tiga hari tiga male kalu nih!

Untuk akhirnya, adik Siti seru semua oghe gunalah bas nih!